يا لاعب (شعر شعبي)

ويا لاعب ببنات الناس فرحان بجهاله نقول فيك قواله لغدر والعيبه للناقصين مش للرجاله يا ساري في لعقول كي الماء في السبّاله فعل العيب راهو ديما شين موش نباله توعد و تخلف بوجهين كالسكين ماضي وتلعب عالحبلين تحلف بيمين ما تبدّلها لا بواحدة لا ثنين بالعرس توعدها تمنّيها أيام وشهور و سنين تراودها واحدة تغويها بالمال وانت عاله والثانية بكلام معسول تخبّل عقلها مسحورة تبّع فيك كالمنقاله انت فعلك في بنات الناس موش شويه تسخايله هيّن و هو عند الله اذيّه و عند الناس نذاله ليوم فعلك تلقاه يا لاعب ببنات الرجّاله نسيت لي عندك ابنات وكيف ما عملت ينداراك عداله لي عملته واعر... شي موش طاهر توعدها بكلام مدهون بعسل وانت ساهر وفي الصبح تحلّ عينك تنكر وعودك من حينك وانت قاهر لسيفك شاهر تقطع حبال اللطف وتتغيّر حبل الكذب مهما طال راهو قصيّر فعل الرجال في الدهر معروف لا يلاوع لا يحيّر كلمته كالسيف قاطع لا خرجت من فمه تسري قانون عالكبير وعالصغير يقبّل للحوش من بيبانه شعليه في الشباك يخليه للخنابه ماشي مغرور بالكذب مشهور صيد بوقلاده اصغ كلمتين نقولهملك سمحين حنا الكذب لا من طبعنا لا شيمنا كلمة الحق في عرفنا للحرّ راهي دين موشي عاده و يا ولدي كان فيك عينين ارجع عن طريق الشين لي تبع سنة الوالدين يجيب اهله وحبابه جيتكم خاطب راغب في بنت لصل موش كذابه من يومنا ناوين عالخير منهوعابه هذا فعل لصول من زمان يطول حكمة لجدود ذهب معيّر لا يصدّي لا يتغيّر قالوا الدّهر يومين: يوم حلو زاهي زين ويوم مرّ عدّيه بالصبر راهو يفوت كل حيّ يموت ويبقى أثرك خير والا سيّه ربّي ما يرضى بالضّيم تديرا ثنيه ليوم نفرحو جمليّه لا سوّ لا سويّه هاو بينا عهد لا نخون لا نغدرها بالذهب نحكّرها لا يوم نقهرها لا نغيّرها بنات الناس كالضوّ في العين تنوّرها يا سامع كلامي ننصحك وننصح نفسي ليك يا ولدي وجّهت كلامي ديما نوصّي الفاهم بالتجراب يتعلم لا يحتاج درس لا قرايه لا يوم توجعني ولا تطيّح كلمتي ترجعلي نكايه في دنيتي حيّ ولا كان في القبر متوفّي بنت الناس أمانه مهما ادّير ما توفّي ولا حقّها وحق اهلها راك تكفّي ويا فاعل في بنات الناس بجهاله نقول فيك قواله فعل الرجال معروف من قبل موش حياله