ضاڨ خاطري(شعر شعبي غنائي)

هذا قصيد باللغة العاميّة الجربيه قلته في جربه البيّه إن شاء الله ينال إعجابكم.🌷 ضاڤ خاطري هزّيت عيني من ميدون نشوفا ناظور تاڤرماس وسط النخل العاليات عروشا خلخل نفض الروح زهَا الڤلب مِلّي ريتَه بحر سيدي جمور والڤالة و المطار في مليته منين وصلنا للجرف والبطاح خدّم و جرى بينا تهزّ الڤلب هزّان للجيم و مزران فيها مالينا شاهي زيارة " الخمس" والزردة سنين لينا عليها سُنّة باهيه وعوايد أبّاتنا وجدود ربّونا بيها صيفها محلاه في أوسّو بشطها والنخل وظلّه لبحر سيدي الياتي و آغير شاهي بنعمل طلّه زيتون شملالي وزلماطي في الوادي غرسا جدّي مّحال نسلّم فيه كانش لغصرة ولا عاد ادّاني ربّي حواش و منازل عامرة بزيتها وكرموسها وتمرها مزراية و غيزن ومحبوبيين وڤلالة بمطامرها وجوامع من التاريخ عامرة بالعلم و بسيِرها سيدي طاهر و جامع الكبير في الحشان من أوِّلها والغازي مصطفى في التاريخ لبَّى وجاها باسطول بحري خلّا السبنيور عبرة لمن عاداها جربة بلادي أباضية وأمازيغ خذينا وتصاهرنا سُنّة مالكية وعِبرية في الحارة والسّوڤ تجاورنا لا يوم عادينا بعضنا ولا لحڤ الجار تنكّرنا أهل كرم وجود أصلنا وارثينا و بيه تشهرنا خيرها كثير علينا ما يوفاش وعَل البرّاني أمي الحنّانة قالتلي خوذيه جربي بلعاني نشمّو يدينا نشبعو الحمدلله من ڤبل ساترنا لا نغوّثو لا يوم لذلّ طيّحنا راسنا و ڤدرنا سليمان جِدّي الغنّاي قال فيها شعار نتذكرها جربة بلاد الثوار لفرنسيس صحيح ما تڤهرها بن يوسف وبن عطية زعامه وريّاس من الفلّاڤه تونس بشمالها وجنوبها يحلفو بريوسهم صنداده هذم كليمات من راسي ڤلتهم فيها وشويه واجب يا جربة العزّ نغني عليك موش مزيه